Казанда DVB-T2 форматлы цифрлы телевидение гамәлгә керде
1 март 2012 ел., пәнҗешәмбе
Яңа DVB-T2 форматлы цифрлы телевидение гамәлгә кертеп, Татарстан үзен тагын бер тапкыр инновацион регион итеп күрсәтте. Бүген Татарстан Республикасы Президенты Рөстәм Миңнеханов яңа төр телевидение кертү тантанасында шул хакта сөйләде.
“ 2013 елда булачак Универсиада алдыннан эшләнгән бу эш бик әһәмиятле. Авыл җирендәге кулланучыларга моңарчы андый мөмкинлек булдыра алмаган идек. Инде кабельле телевидениегә бүген җитди көндәш барлыкка килде һәм ул халык өчен бушлай, сыйфаты буенча өстенлектә”, - дип билгеләп үтте Рөстәм Миңнеханов.
Яңа телевидение җибәрү тантанасы бүген Казан телевидение үзәгендә булды. Анда РФ Элемтә һәм мәгълүматлаштыру министры урынбасары Алексей Малинин, ТР Премьер-министр урынбасары-Мәгълүматлаштыру һәм элемтә министры Николай Никифоров, “Россия телевидение һәм радио тапшырулар челтәре” компаниясе генераль директоры урынбасары Виктор Пинчук, бу компаниянең Татарстандагы филиалы директоры Владимир Якимов катнашты.
Татарстан Республикасы Россиядә беренче булып, узган елның декабрь аенда DVB-T2 форматлы цифрлы телевидение гамәлгә кертү тестын куллана башлады. Цифрлы телевидениедән тыш бу формат өр-яңа хезмәтләргә юл ача. Яңа челтәрдә адреслы идарә итү системасы аша абонентларга дәүләт хезмәтләре хакында төрле мәгълүмат алырга, электрон хәбәрләр тапшырырга, электрон рәвештә акча күчерергә мөмкинлек бирә. Яңа челтәр җәелдерү белән беррәтттән, гадәттән тыш хәлләр барлыкка килгән очракта халыкны кисәтү системасын сынау зоналары да булачак.
“ Беренче тапкыр яңа стандартлы тапшыруның Казанда, барлык инновацион продуктларны һәм хезмәтләрне хуплап кабул итүче шәһәрдә башлануы күңелле күренеш”, - диде Виктор Пинчук.
Узган елның декабрь аенда республика башкаласында мондый стандартлы цифрлы тапшыру программаларның беренче пакетында (“Первый канал”, “Росссия1 ”, “Россия К”,”Россия 24”, “Россия 2” “Петербург -5 канал”, “НТВ”, “Карусель”) 2009 елның 24 июнендә чыккан 715 номерлы Президент указы нигезендә башланган иде. Киләчәктә түләүсез программалар саны 20-24 кә җитәчәк.
Цифрлы телевидение Казаннан 40-60 километр әйләнәдә тотылачак. Казан телевидение үзәге башнясыннан таратылган сигналлар зонасына Яшел Үзән, Питрәч, Лаеш, Биектау һәм Югары Ослан муниципаль районнары торак пунктлары (барлыгы 1,4 миллион кеше) керә.
Цифрлы телевидениене махсус җиһазлар аша яисә шушы форматны кабул итә ала торган телевизорлар аша алып була.
Казанда бу стандартлы телевидение тапшыруларын регуляр рәвештә 2012 елның 2-нче кварталыннан башларга планга кергән.
DVB-T2 форматлы цифрлы телевидение тапшыруларын бүгеннән үк республика халкының 40 проценты карый ала. 2012 ел ахырына тагын алты көчле станция төзеләчәк ( Түбән Кама, Яр Чаллы, Лениногорск, Шәймәрдан, Биләр, Чистайда), һәм ел ахырына халыкның 70 проценты, ә 2015 елга - 100 проценты җир өсте эфирлы цифрлы телевидение мөмкинлекләрен куллана алачак.
Белешмә:
DVB-T2 (ингл. Digital Video Broadcasting – Second Generation Terrestrial) европа DVB-T стандартының икенче дәрәҗәсе. DVB-T2 стандарты, элекке инфраструктура һәм ешлык ресурсларын файдаланган очракта да, телевидение челтәрләренең сыешлыгын ким дигәндә 30 процентка яхшыртырга тиеш.
|
|
|
|
|
|
|
|
|
|
|
|
.jpg)
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Хата таптыгызмы?
Сүзне яки җөмләне билгеләгез һәм CTRL+ENTER басыгыз